WAZIRI MKUU MAJALIWA AWATAKA WASIMAMIZI WA RASILIMALI WATU KUZINGATIA MISINGI YA UTAWALA BORA.

ZINGATIENI MISINGI YA UTAWALA BORA KATIKA USIMAMIZI WA RASILIMALI WATU.

Na Lucas Myovela -Arusha.

Waziri Mkuu Kassim Majaliwa amewataka wasimamizi wote wa rasilimali watu wazingatie misingi ya utawala bora na weledi katika kuisimamia rasilimali hiyo katika Sekta ya Umma Barani Afrika.

Amesema kuwa kufanya hivyo kutasaidia kwa kiasi kikubwa kuwezesha kutoa huduma bora na kudumisha imani ya wananchi kwa Serikali zao.

Ametoa wito huo leo Novemba 04, 2024 alipomuwakilisha Rais Dkt. Samia Suluhu Hassan katika ufunguzi wa Mkutano wa Tisa wa Mwaka wa Mtandao wa Wasimamizi na Mameneja wa Rasilimaliwatu Katika Sekta ya Umma Barani Afrika (APS-HRMnet) jijini Arusha.

"Rasilimaliwatu ina mchango mkubwa katika kuiwezesha Serikali kufikia malengo ya maendeleo iliyojiwekea pamoja na Malengo ya Maendeleo Endelevu."Amesema Majaliwa.

"Hivyo ninyi, kwa kuwa ni wataalam katika usimamizi wa Rasilimaliwatu mnao wajibu na dhamana kubwa ya kuhakikisha mnasimamia pasavyo Rasilimali hiyo muhimu na ya thamani". Ameongeza Majaliwa.

Aidha amesema kuwa ili kuimarisha usimamizi wa kimkakati wa rasilimaliwatu na kukabiliana na changamoto zake, viongozi hao wanapaswa kuendelea kutoa mafunzo ya mara kwa mara kwa watumishi wao waendane na mabadiliko ya kidunia na waweze kufanya kazi kwa weledi.

Pia Waziri Mkuu Majaliwa amewataka Kukuza ujuzi wa watumishi na kuwawezesha kujifunza stadi mpya kulingana na majukumu yao.

"Ongozeni kwa maono, ubunifu, uadilifu na kuzingatia Sheria, Kanuni na Taratibu za Nchi husika katika kutumikia wananchi kwenye maeneo yenu". Asema Majaliwa.

Mheshimiwa Majaliwa, amewataka viongozi hao kutafsiri kwa vitendo Dira ya APS-HRMnet ya kuunda mtandao thabiti wa kitaalamu wa mameneja wa rasilimaliwatu katika sekta ya umma kwa kufanikisha malengo ya huduma bora.

Kwa upande wake, Waziri wa Nchi Ofisi ya Rais, Menejimenti ya Utumishi wa Umma na Utawala Bora Mhe. George Simbachawene amesema kuwa mkutano huo umefanyika katika kipindi ambacho dunia ina changamoto zinazohitaji mijadala, kubadilishana mawazo ili kujibu masuala magumu yanayosababisha watumishi wa umma kutofanya majukumu yao sawasawa.